SUANGTUAHNA: DELHI PAN GUITE KUAL | Siamsinpawlpi Zoudawn Coaching Lungthul Camp

SUANGTUAHNA: DELHI PAN GUITE KUAL

Siamsinpawlpi Zoudawn Coaching Lungthul Camp

- M PAUMINSANG GUITE

Limte https://picasaweb.google.com/104984464724778400736/TeachZodawn2008BySSPPGHQ

December 2007 a Khristmas zang ding leh April kha 2008 a Central Lamka EBCC Silver Jubilee leh Biakinn Thak Honna uap dinga paikhin tutung Summer khawl bel painawnlou ding chi mahleng Pathian lemgelna toh aloutheilou hihding poimoh a omziakin, June ni 7 in Delhi nusia a Lamka lam ka paithut nawn hi. Tutung innlam paina toh kisai lampi a thil tuah tuamtuam te leh Siamsinpawlpi (SSPP) Zoudawn Coaching chi in Sarva Shiksha Abhiyan (SSA) nuai a, Guite Kual a LUNGTHUL Khua ah, (SINZAWL Khua tel in) Residential Bridge Course (RBC) asaina uah kava kihel khakna a, tuni tana lungsim hon khoihthei thiltuah leh ngaihtuahna tuamtuam apan hiai bang laigelh hong pawt hi.

I

Delhi pan Lamka via Dimapur-Imphal: Train, Tourist Bus leh Line Bus ah

Lamka khua naihpen Dimapur Station tan pai Brahmaputra Mail kichi, train tai awl detdut khat, ah Delhi apan Dimapur tan dakkal 50 phial khong mahni kia a 'khattang sawlbang' i heingat leh chu kingaihtuahna di hun tam peuhmah dan hi. Chimhuai leh ninhuai lawman ahih manin tulai a azawng-ahau iki chihmuh uh lenna a pai kihileh bel i Nu te kiangah "Nu, tuzing ka flight uh ahi a, nitaklam singzual leh baalmeh ana huan un" kichi di hia chih khong hon pawt mun  mahmah hi. Himahleh Government in Student te a dia a sehsak Train Sleeper Class a kilehtuah akihih manin sum tampi aki save ban ah, kha 7 sunga 3vei tak bang, i Nu/Pa te bang kimantaka kimupihzou in, singzual leh baalmeh leng kimeh man law mahmah lai dan ahi.

Duh thusam khat bel, Pa Lienkhothang te bang damlai u henla Train in Lamka tan kia hilou in 'Guite Kual' khong tawnkual sak thei henla, India khawpi mun tuamtuam a haksa taka laizil a omten leng Biharite bangdeuha i khua atunchianga 'alarm chain' kaiha kum geih di himai hia... Himahleh, hilou phot ahihmanin, Dimapur Station ka tung in, Imphal tan paiding talpakte bus delhzui pah ngai mai hi. Sumduh chiat chihmah tak bus cabin a talou ding passenger tutsak sawm in amau leh amau hong kina loiloi thahah laizang uhi. Keileng, “bus sung, alai a paina ah tungeilou lah hilou inga' chi in kum sawm tuanlou a ka ding tinten leh papila khat in Thadou pau in hon houpih a, akiangah honna tusak hi. Kenleng, Thadou pau theihteng in ka houpih a, ka ki houhou ualeh bus tainung sawtlou in Paite te tuak ka hih dan uh ka ki theituah pan uhi. Aman ah "tulai thil om phutphut nuam ziaka khualgam theih ngeilouh kiangah i pau (Paite) tak bang kizang pahpah ngamlou ahi" hon chi hi. Pilvan huai mahmah chu ahi na a, bangziaka i pau (Paite) a pau a, min ihihna hon theih uh bithuai salou theita mawk, lah, bangziaka Delhi leh Guite Kual lak khawng ah lah huchi hetlou zel? Ngaihtuah tham ching hi.

A mailam glass omlou bus hoihlou chik khat ah tuang kha chih mah tak, lamkal ah Bus 3vei hong kisia a, dakkal 6 khong ka khawl hilhel ziak un, Imphal apan Lamka paiding linebus last ka lap chenchen uhi. Line Bus le dim law mahmahta ahihmanin atunglam ah tampi ka tu nainai uhi. Mun nih ah Manipur sepaihte'n honna kham ua, ka tamluat ziak uh ahi achi ua himahleh sum apiak ualeh bel hon taisak pah hiau lel uhi. Angeina banglou takin BANDH ana om kei zenzen a, ka paisuak thei vanglak uhi. BANDH om leh omlouh chih khongle kipahna thupitak suak thei maimah dan hi. Inn tun kuan Moirang-Kangvai-Molnom-Tuibuang leh New Bazar i hong tungsuk zungzung chu, lampi a igimna teng tamlou lou a kipai khe suk ziahziah akibang hi. Innlum ihong lut leh i Nu/Pa ten "nong paimun ngei" honna chi hetlou banah ana kipak leh lawplua uh ahihman un, innlam pai ichih thil kisik huailou pawltak leh paitheih hun a pai pai din hoih hi.

Guite Kual pan Sapna: SSPP RBC Lungthul Camp ah

Nikhat, SSPP GHQ a Heutu te'n SSPP RBC Lungthul Camp tarik 21-26 June adingin hong chial ua, innkuan pihte lemsakna toh 'aw' ka na chi in. Lawmpa Muanthang le om di banah June 25 ni a Songtal Programme le tel theih ngal ding chih khong a om ziakin a lit huai na anep deuh hi. 2002 Summer suti laia Mualnuam Khua ka va phak chihlouh Guite Kual ah hoh khanawn nailou kahih manin, huailai bangin uihik khong om khaleh chi in ka kisakhol gu nak sim hi. Loh tampi sang dia singtanggam tangkha/posting a omte bawn a om peihlouhna uah, suti tomchik sung kia SSPP vaia phatuamngai kisa va om cheuh di chihbang tuh thil haksa leh lithuai thak sim mahmah mawk hi. Huaibanah, Biakinn sunga dakkal 2 lel le mobile switch-off haksa sa te a dingin, network om hetlouhna mun ah ani a sim va om di chih bang thil haksa pi di bang kasa hi. Kilawp law tuntun lou dan ka hi.

June 21  a kuan ding chih himahleh June 23 adia asuan ziakun, hiaini zing dak 5:30 in Lalminlian Travels ah Lawmte 3 toh kisawi tou neknek uhi. Lamka apan Singngat tan lampi ahoih dan tuh Delhi a EBCC Biakinn apan Dwarka Flyover kikal a lampi sanga le hoih zaw thamtham hi. Himahleh, Singngat ban a Guite Road ahihleh huchi nawn hetlou a, khantouhna nawngkai sak mahmah ding ana hi hi. Dam tui ching, i gam sing, mual leh guam te et tham ching leh et nuam mahmah hi.

Sunkim laitak in LUNGTHUL Khua ah lawmpa leh antang halfbag 2 toh ka tung ua, Lawmdang 2 te bel RBC SINZAWL adingin paisuak uhi. Pitek, putek leh inn ngak a om naupangte chihlouh siah teng loukuan khin vek zaw ahi ngei ding ua, a khua ana dai zikzek zou hi. SSPP RBC Lungthul a Heutu a ana om masa ten honna vaidawn ua, SSPP LUNGTHUL BLOCK Office mun ah zing ann ka ne ngal uhi. Kinel baih deuh nang chi uh ahi diam ah tengkil ka va kiss  chokchok pah uhi. Apaita Kiginni a Heutu te makaiha naupangte toh Tuilak Lui  a ava sawk uh meh kha ka na hi dan uhi. Hun tom kinei law mahmah ahihmanin in ki zahkai sak na di hun omlou in, ann nezou in RBC neihna mun, Convention English School (CES) ah paiphei ngal in, Sir Head DM in mellahna hong vaneih pih pah leh sinlai naupang khenkhat bang Heutu a ana panglel te paidi sa in ana khase dek mawk uhi. Naupang ten mi nelbaih, ngaina baih leh khelah pahpah uh ahihdan awlin ka thei khe semsem hi.

SSPP RBC LUNGTHUL A NITENG HUNZATDAN HI
Hun	Thil Hihte
0600-0700	Devotion and Singspiration
0700-0900	Morning Meal
0900-1100	Classes
1100-1130	Break
1130-1230	Class
1230-1300	Tea Break
1300-1400	Extra Curriculum Class
1400-1430	Assignments
1430-1530	Games and Sports
1530-1730	Cleaning and Evening Meal
1730-2000	Entertainment

A zahtakhuai SSPP RBC Lungthul Camp a Heutu pih teng:

1. Sir T Doumuanthang, Headmaster, CES Lungthul.

2. Sir T Lalboi, Headmaster, MES Lungthul

3. Miss Chingneu, Teacher, MES Lungthul

4. Sir John Paul

5. Miss Ciinngaihnem

6. Sir T Gousuanmung

7. Sir Vumkhansuan Valte

8. Sir Thangchinlam

9. Sir Ginmuanthang K

10. Sir N Chinzabiak

Cl V+VI(Kum 10-12 lak) leh Cl VII+VIII (Kum 13/14) kigawm in Class nih in ana khen uhi. Naupang 50 (Numei 28) in admission a bawl ua himahleh mi 6 te atawptan tel theilou uhi. Ann leh singpi ding ahihleh Block Heutu ten ah niteng a tuanvai ding khosung mi ana kisep ten ana sai ua, naupang leh heutu ten mun khat ah an kine vek hi. Hiai toh kisai ah Lungthul Block President leh a Lungthul khomi te kithuahpihna pahtakhuai banah, amau kihonna leh lemsakna ziaka hiai Khua ah hiai bang vai SSPP in vai sai thei phet uh hidan hi.

Amun ah, hihtheih bangbang hilh ding chih ahihmanin in Extra Curriculum ah ‘Laimal Tehdan’ ka vahilh banah Physics Subject ka va hilh hi. Matters, Measurements, Motions, Forces, Lights, Magnetism, Electricity leh The Universe chihte apan amau theihsiam leh zat theih pah ding Cl VI Text Book pansan in hihtheih khomkhom va kisuah khia hi. Huaibanah, Heutu dang ten English Grammar, Mathematics, Spoken English chihte leng hilh uhi.

Naupangte pawl nih MARS leh VENUS ah khenin Numei hi in Pasal hitaleh Volleyball leh Football kidemna kinei gige hi. Khatvei bang SSPP GHQ President Pu leh Heutu dangte heu in Heutu kichilou in football kimawlna khong ah naupangte bang kava delh tonton sek ua, nuam chihlouh gending omlou. Naupang kum 12/13 lakvel himahle uh, Delhi Siamsin Sports Meet a numei volley ball kimawlte toh teh vual ahikei uhi. Service kailouh chihte abuaipih pen uh hilou in su kai tuah ziahziah zou dan uhi. Lehkha lam hi in kimawlna lam hitaleh Delhi a naupang khenkhatte phaklouh gimnam tampi om un ka mu a, awlmohhuai leh saupi atun ding uh deihsakhuai tampi om uhi.

Electric tung nailou himahleh akimkhat pha phial di in Solar Lamp leh Inverter nei chiat ua, ni asat hoih nakleh Lamka khua sanga mei paihoih zaw dan ahi. Huaibanah, EBCC, NTBC leh PCI Biakinn te ah mei kiching zaw om ahihmanin Saptuam heutute phalna toh nitak chiangin kipolhlimna hun kizang zel hi. Chap Chali, pau ching, lasakna, Extempore leh Debate te kineihpih zelzel hi. 'Khua laklak ah Lungthul khua hoihpen/thupipen ahi' chih a Debate nei in leh Lungthul Khua toh kisai a Extempore Speech neihna te bang ah a khua thu uh saupi hon gen ua, Lungthul khua kithei chian semsem hi. Lamzul kia ah teng ut ziaka khodungsau ahihdan, gan ziaka khua siangthou louhna, Biakinn tam, Job Card (nregs) chih khong ahah gen pawl te uh ahi a, hihtheih omlou chiatchiat, singpi dawr leh internet khonga awlmoh kisa a gengente toh aki khiat luatna om kasa kei hi. Huchih louh kal chiangin, Lungthul khua ah video ettheihna om a, huai ah film va ki etpih zel hi. Film khat etman mi khat ah cheng 1 geih zel la ua, Inverter adown lehbel azing chianga etman piakbeh chih omlou a etzom di himai hi. Delhi a Cinema Hall PVR kichi a mi 1 movie et man in RBC Lungthul camp a naupang omteng 3vei bang treat suak zou mahmah didan ihi. Khopi leh Khota a 'khosakman' (cost of living) ki khe mahmah maw... Ken leng ka et nailou 'The Forbidden Kingdom' Jackie Chan leh Jet Li film bang ana en khin dan uhi. Hiailam ah chu changkang kin mahmah zel ua, thildanga khantouhna te ah leng hichitukin kinohthei leh a chihhuai tel mai hi.

Nitak ahihleh mahni inn/omna chiat ah kigiak chiat hi. Kuandek kigin dan bangteuhlou in uihik leh hon siasia ding namsia chihte bang om hithet lou banah khualpuan ding hoihtaktak ana nei ua, ihmut lim thei mahmah hi. Huaiziak, naupang ten honphawng kha gige ua, khopi khong a nisuah mu man ngeilou te ading zaw ahak tel mai…

Siamsinpawlpi vai himahleh zingkal chiangin Devotion hun chiangin Pathian la zilna nei in, nitak mipi kikhop hun chiangin khosung a Biakinn Li omte ah La toh vehna va kinei nainai zel hi. Khatvei bang ZOKIDS ten hun hongzang kha ua, nuam mahmah hi. Naupangte la alunglut ua, a theibaih thei mahmah uh leng kasa hi. Atamzaw ten la azak khakte uh theisuak pahpah uhi. 'Hondomsang' la ngial bang athan laitak leng ahi a, a kisa mun mahmah hi. Delhi leh Khopi mun tuamtuam a om, ut hunhun a ngaihtheih ding MP3 Player, Mobile hoihtak, Disc leh Computer ah, i damsung a leng la i ngaihzoh nawnlouh di neiten Pathian la theihsuak inei hiam chih kidong le, hiai naupang la ngaihna di nei zoulou te mai ah bel thil zumhuai pi suak dingin ka ging hi. Singtanglam ten aneih sunsun uh hoihtak a zangin phattuampih ua, khopi a tengten bel ineihtam zang manlou hial in neihbeh ding kia ki buaipih khop dan ihi.

Sun in Sialbu Khua, Thuangtam Khua leh zanin Singngat Khua meivak te kigal muh thei hi. Lawmpa MT in Digital Camera hon tawi in gam leh maulte, a khosung, leh hunzatna te lim tampi aki la hi. Naupangte bang limlak kipahpih mahmah dan uh hi. Naupang teng 'single limlak' ka la suak vek ua, sawp khiat le hinai kei mahleh, naupang khat bangin "Sir, kei single a ka kilak khak patna ahi" hon chi hi. Huai hun geih in, computer a MB bangzah hiam limlak sawpsak zohlouh neite sanga zaw kipak zaw tham din ka ging hi.

June 25 ni pen Songtal Programme a om ziakin Lamka lam apan gari hun khop hong tai tung zungzung hi. Nikhat a gari kileh tamlou ahih manin class la lai bang ki melhmelh kha dan hi. Singtang a naupangten gari ana et vungvung sek uh huai in ka theisiam mahmah ta hi. Kuan ma in bel Songtal Programme va uap/tel ding chisim ka hi a, himahleh i hunneih a tawm toh i lungsim ah naupangte kia omta leh awlmoh kibang nawnlou ahihmanin ka hoh nawn kei a, class ka lak di bang in ka la zom tou hi.

June 26, 2008 in Songtal a hoh hongkikte Gari ah tuangsuk di chi in kisa diam in ka om uhi. Lawmpa'n Spanish pau 'Gracias' leh 'Hastalavista' ahilhte hong chih khum zatzat uhi. Lungthul naupangte Guite Kual a Spanish paumal thei masapen khawng ahimai du e maw!!! Lametlouhpi in vengte gari khat a hon taigeiha huai ah ka tuangsuk ua, Lamka tan chiamnuih ahon bawlpih ziak un, thawmhau taka paisuk ding lai ahon nem mahmah uhi. Lawmten,  Songtal Programme khong hon houlim suk nouhnouh ua, Lungthul apan Lamka kikal a gam leh mual lian pipi neitu te hon gen na uapan, singtanggam mun tampi a neitu taktak te leng khopi lam a tengte ngen ina hi maimah hi. RBC Lungthul nuam va kisa law man in, naupangte leh Heutu te apan ngaihnatna lianpi akidongte ziak te mahmah in lung ahon suleng diak a, khiaklah huai kasa mahmah hi. Lamka ka tunsuk taktak un chu, lungsim ah zaw "bangchik chiangin kahoh kha nawn dia?" chih kia hita mai. Lawmpa MT toh awlmohlai tuak ka hi di ua, ka tun nung un Lungthul RBC naupangte ading la, video leh poimoh dia gintak te kava khak tou kik pah uhi.

II

Lungthul Lunglenna: SSPP RBC Lungthul Camp Closing

RBC Lungthul lah lunggulh lai mahmah ngal, July 3 a Dimapur pan Delhi train ticket Waiting List a omlai kizen sa in Imphal ah va cancel in SSPP RBC Coordinator Pu kiangah Lungthul ah kuanthak nawn dingin ka kingena, ahon phalsak uhi. July 2 zingkal in Guite Kual lam adingin ka kisa thut nawn a, sungte kuamah kiangah hoihtaka gen manlou kahih manin in Lalminlian Travels apan mobile ka tawi khak zenzen apan inn call suk zokin “Lungthul kava zindeka zinghal chiangin kong kik di”, chi in ka hilh nimnem hi. Hoh masaka lit huai leh gamla kasak dan toh a tutung ka zinding ka phur dan a kikhe mahmah ta mai hi. Painuam leng naichik hi a…chih dik mahmah hi.

Tutung zin nawnna bel ticket la manlou in gari tungah kituang tou neknek nawn a, gam leh mual te chiang zawsem in akimu thei a, etlawm sa in mittai huai mahmah hi. Himahleh, vuah ana hah zuk mahmah ziakin Guite Road leng ana nawi leh sesot mahmah a, gari tailah mahmah hi. Lungthul khua ka hongtun nawn in naupangte class lalai hong pawt mawk ua, chibai hongbuk sosouh mawk uleh, om dingdan le kitheilou dek in ahon ngaihnat dan uh mit mahmah in kava muchian a, lungsim hon khoih mahmah hi. Kei kia ka hihmanin "Sir MT lah...hongkik lou di hia?" chi in hon dong kheukhou uhi.

Lamka kava paikal, Pathianni khatvei 'Hotdamna Chialpi' ana neihpih ua naupang 12 ten kilat thakna neithei uhi. Pathianin i Pawlpi tungtawn ale a na thupitak hon semsuah sak a, kipah huai kasa mahmah hi. SSPP leng zangthei ahi chih ka phawk a, Pathian in i Pawlpi ompihna ahi chih achiang hi. Khenkhat inbel i Pawlpi hoihna omsunte i mu utkei teitei ua hiven maw!!!

Ka kuanthak ma, ni bangzah hiam 'menchim' ziakin gari ana paithei pah kei hi. Huaiziakin anntang leng ana tungkeia, a innchiat uah ann ana kinek chiat ta uhi. Nitaklam khat, kimawl hun ah, numei tamzaw ten "Sir ka anhuan di om, kana pai aw" chi in hon kingen kheukhou uhi. Lamka leh Delhi khong ah nungak ann/meh huan theilou tampi a omlai ua, naupang hiai chiah te hon ngetna uh gintak hak leh kilep uh ahi de aw chi in ka dong chian thakthak zawzen kha hi. Nu te tha dawn baih mahmah zel uh!

Nitak khat, naupang pasal khat giahpih di chi in 'tap' kiang ah tu in ka houlimpih uhi. Vasa beng dia amah kia khonga kuan ahihdan leh vasa 56 manta ahihdan hon gen hi. Computer games a Easy, Medium, Hard chi a setting omte a a 'adventurous' huai dan toh teh theih hetlou ding dan hi. Kum 12 vel mi ahi a, Shooting lam ah hoihtakin chiil theileng Olympic GOLD chu ei a ding hisa maw!!! Himahleh, Peta te hat hile uh bel, naupangte kisuklim na di om hetlou ding bang maw!!! Ignorance is bliss.

RBC Camp beidek ta ahihmanin Exam khatvei neisak in, huaizoh RBC khakna a omdek ziakin kisakkholhna lam in hun tamzaw aki zang ta hi. La zil, Banner tep leh pakkhi bawl khongin naupangte buai thei mahmah uhi. Huai kawmkal ah ken agukin thawmhau huai kasa deuhdeuh hi.

June 4, 2008 ni SSPP RBC Lungthul Closing Programme ading kisakkholhna afel sim takin, Maikaite lemgel siamna toh kikhakna danin Naupang teng toh annekkhawm na om a, voksa meh in kitai mahmah hi. Lamka apan Makaite khuk tan buannawi bang leh a neng puan ak ah dim in hongtung ua, azoh sawtlou in Sinzawl RBC Closing zou a hong pai Makaite te hong tun kim tak un Closing Programme zat pat ngal ahi.  Naupangten kawngtan pel di khong Pak(tak)khi Heutute hong oksak ua, hiai anuai a la sa moh dek hial leh mittui tampi toh hon sakkhum mai uh zaw, pasal kihi mahleh kidek haksa in, i mittui bang ana vung keikui maimah hi. Lungsim hon khoih mahmah a, mangngilh chih zaw haksa mahmah ding  hi.

Ala: KHIAKLAH HEUTU IT DEIHHUAI AW

Aw Lunga ka gelgel chiang un

Ngai ung kholhlai nite

Heutu deihhuai toh lenlai ni

Nong it nan khanglian ung

[Sakkik]

Khiaklah heutu it deihhuai aw

Na nuai a siamsin teng in

Hon it ing hon khiaklah lua ung

Chikleh kon ngilh ngei ding uam?

Heina peuh ah lamzang in la

Lung in hon ngilh ngei ken

Kou zong non thuhilhte lung ah

Ngilh ni nei ngei kei nung

Non it na thuk in lian lua sang

Hong ompih lai le te

Chiin naubang kap in hon khou ung

Bangteng Sian simthu hi.

[Tuilak khomi, Sir Minlun, CES Lungthul a sem ngei in, Pathian Ngaihla No.304 "Lung hon len gal don chimlang e..." chih lakaih a sak dia aphuah achi uhi]

Khi a ding pak alohna uah kava zui khak zek ziakin aloh haksat dan ka theih banah naupangte ngetna bangin RBC Closing Programme beima sungteng 'pakkhi' ka okden chiat uhi. Huaibanah, mittui toh ka sang uh ahihna toh ok thaman leh manpha kasa law mahmah hi. Programme zatkhit in zekai simta ka hihmanun paisuak ngal dingin gari lam ka zuan uhi. Naupang ten lah mangpha khak ding in hon zui nainai ua, akhen khasia leh mittui pak khawng a omte i muh chiangin zaw, gending pen leng theih ahak tel ta mai hi!!! Naupangte hon ngaihnat na uh thupilua ahihdan ka mu semsem a, hiai khovel khualzinna gam chih mah tak, ki khelah tak mai in Lungthul Khua nitaklam dak 3 in i Pawlpi gari Tavera leh Sumo dang khat in, Lamka lam kong tai khe thei khong uhi. Kuan ma a thasial huai ka sak toh ka paidek ua a khiaklah huai dan chu teh vual ahi nawn kei hi.

Guite Road: Ground Reality-Buannawi

Pumlong leh Suangdoh kikal mun khat ah gari hong tang laizang a, buannawi lak ah gari sawnna nasa tak mai kinei a, gari taikhe zou hamham nawn hi. Keibang a, kum khat a khatvei leng i gam buannawi leng sikkha ngeilou phial ten, i gam awlmohna a ngaihdan khauh taktak i gengen te zaw hichibang a buannawi ana palpal te adia zuih ana hak mah ding...chihphet in om hi. Suangdoh khua ah buannawi lawpi teng hahsiang na nei in ka khawlzek uhi. Azoh, lampi ah, tuanpihte toh kong houlim suk den ua, i gam mun ah ana om te toh, agal Delhi khong leh Internet khong a i gam awlmohna a houlimna te toh bel kibang khol hetlou dan ana hi. Gen leh gelh mai a phatheilou 'Ground Reality-Buannawi' chih te bang khong tam ana om neuhneuh ngut ngei mai!!!

Lampi a Mi Hampha: ZOKIDS leh MAKAITE toh

Hamphathuai takin, ZOKIDS te toh ka tu khawm kha ua, a kiang uah SIMAS 2007 zang dia Delhi nong zin ua, 'Tuailaite' chihla nasak lai ua mi 3 pak hongpe te laka khat keive ka chih leh, honthei deklou dan ahi. Ka theisiam, celebrities ten a fans teng uh theisuak chih omtheilou mah hiven maw...himahleh, Fan khat in a Star khat houpih kha chu...hampha tuan, ka kisa veve hi.

Mi khenkhat adingin bang hikei mahle uh, i gam adia gim leh tawl genlou a singtang dawn a kalsuan khia, i Pawlpi Makaite leh i khuampi apang mi kipezou bang zah hiam viz. SSPP Standing Committee Chairman & Secretary; SSPP GHQ President, Secretary & Executives; SSPP RBC Coordinator; CDSU President; Tongluang Editor; ZOKIDS leh aheutupa leh RBC Heutute, teng toh na thupi khat semkhawmzou a gari ah ka hong tuan khawm khak bang agukin kisaktheihna lianpi ka na nei hi. Kudos!!! Mata  Khua tunsuk ma deuh a ‘Only Grace Prayer Mountain’ ah Pathian kiang ah kipahthu genna thumna neih zoh dak 6:30 pm in Siamsinpawlpi Complex Bungmual ah hun saulou zangin Chairman Pu leh President Pu ten innkong chenchen ah hongkha ua, a khiaklah huai Siamsinpawlpi Residential Bridge Course chu bei taktak ahita mai hi.

Himahleh a beithei mawklou ding thil tampi ana omlai a, Delhi ka paima ni in Lungthul naupangte toh ka kimu kha lai ua, mi tuamtuam apan tangmai hunkhop ahon khak ua, kipahhuai kasa sawnsawn hi. Lungthul RBC a muhtheih a ka lohkhiat leh hoptheih omsun chi in, innkuanpihte ading bangzah hiam sit in lawmngaihte nek khak sak teitei ut in Delhi ah tangmai pum nih ngut ka paw tung hi.

Lampi a Mi Hampha: Unau Thadoute Ziak

July 9, 2008 in angeina bangin bus leh train in ka kuantou nawn a, eilawi ngeina bang bok in mi khat in hongzui nawn hi. confirm ticket neilou ka hina ua, Pathian in ka lampi du ana bawlsak zelzel a, Thadoute unau nih Delhi paiding ka va belh ualeh lupna bang hon koppih zomah ua kipahhuai sawnsawn hi. Amau leng Delhi apai patna ding ana hizomah a, kizen sem hi. Tutung, lawmte confirm ticket mulou lah eimi hunkhop amau train mah a paiten lupna ana kep khollou ua ekbuk gei ah agiah uh toh, kikhe mahmah zel, singtanglam haksatna toh teh theihpih leng kasa hi. 'Train seat kichian mu a, pau kibatpih meltheihte ngoihngoih ekbuk kianga ihmu te seat kep sawmloua, zingthoh chianga kamsiam a ki awlmoh pat' a phatuam louh dan toh 'khopi a nuamtaka khosa a singtanggam a haksa leh kial te adia ahunlai a panlak sawmlou a, a gal apan gengen leh gelhgelh' toh kibang geih hi. Khopi a om chiatchiat leng haksat hun a ki awlmohna ana om kei leh khopi a omte'n singtanglam a tengte awlmoh taktak na ding zaw gintak haksa mahmah leh kilawm.

 
12 July 2008, Saturday zingkal in Delhi ka tungkik nawn a, koia atheih khak uh adiam ah ei Siamsinpawlpi ten 'ZOUDAWN VEHNA leh RBC' i hih bangdeuh in, Times of India ten ah ei hihnung in 'TEACH INDIA' chiin minhoihtak khat pia in ana hih tei uhi. Roti/Rajma khuak sangin Maiteh khuak masa zaw sek mah hi maw...

Zoudawn Coaching zou: Makaite leh Mipite

Siamsinpawlpi in tutung a Residential Bridge Course a saikhiat bangbang student organisation dang ten le SSA nuai ah tan muvek uh chih ahi a, tunitan in i Pawlpi kia in atak a semkhe lai hi in ka thei a, tulel a i Pawlpi Makaite phat tak ching kasa hi. Tu-leh-tu in agah mupah ding a omkei mai thei, huaibanah hun tomchik sung in bang tamle va kihilh khe law din zaw ka lamen kei himhim hi. Himahleh, a langlou leh muhtheihlou ‘kizopna’ khat va bawl dan ihi a, agah pen awl a hong om na ding leh vuaksuak lou himhim ding ahi chih ka gingta tinten hi. Chiangtaka kagen theih ombel, ka lungsim ah Guite Kual toh kisai ah, 'chii' hoihtak tuh khin hin ka ki mu a, Pathian in leng honpi dia agah hoihtak leng a hong omngei ka ging hi. Maban ah leng i Pawlpi Makaite (hong hiding) ten hichibang na hoih leh haksa te hon sepsuah teitei zel uh ka lamet ahi gige hi.

Alehlamah, i niteng simthu suahna, Tongluang leh Siamsin Bulletin khong ah SSPP RBC toh kisai Thugelh hunkhop hong kisuah tham ta a, kha khat val paita mahleh i singtang gam amun mahmah a vasem khia i Pawlpi Makaite pahtakna thu ka sim kha vang mahmah hi. Huai nak sangin, a nasep ding hong kigen pat leh ‘amin’ khong mah buaipih in ana ki om kheukhou get hi. “Amin maimai a i gam leh nam it zaw kitam ngut na mahmah e maw”, chih phet in om hi. Hiai toh kisai in, tulai a smsgupshup LENLAINEWS ah bel, kipahdan thei Lungthul Hausa pan SSPP GHQ tungah kipahthu agenna a om a, chihdan siam kasa hi. Himahleh, Delhi leh khopi mun tuamtuam a omte kiselna ding 'internet' leh i group SSPPNET hilhial nangawn ah leng huchibang muh ding a omkei a, poi mahmah hi. Tu malam in bel, i Pawlpi toh kisai thuhoihlou a om a, SSPPNET moderator te khak ngai di hial khopa Pawlpi Makaite genna om kheukhou theizel! Pawlpi awlmoh kichi lah ahoihlam a tawsawn utlou himhim tampi om in ka mu hi. Pawlpi hoihlouhna i gen kheukhou bang un, a hoihna a om khak na chiangchiang te bek kipahpih dan siamle, i Pawlpi Makaite ading in nasep ding nak uthuai sem inchia maw… Bangteng hileh, sum leh pahtakna loh ut ziaka nasem himailou a, a mi leh sa te a it ziaka gensiat poisalou a, na sem dia kuan teitei ngap, Makai hikha ten zaw sum, gensiatna leh phatna te khawng ah kitalpuk lou na ding uh ahi, ka chi a ka lung amuang a, huchibang Makai i Pawlpi in aneih touh zelzel ka thumna leng ahi.

SSPP Zoudawn Coaching a Heutu a ana pangkha te thugelh laktom anuai ate ka thukhitna ahi.

SSPP on the MOVE... and MOVE ON... MOVE ON! | GOD Bless.

"Singtang gamte dopkang nang, khan khiaksak nang leh amaute a dinga a thil hoih Solkal, Pawlpi leh mimal in sum leh pai, tha leh zung a seng te a na laksuh hiam a hihkeh a dal tu a pang hikei le chih ka thumna ahi". - Ginmuanthang Kullai

"I omna (mun) kho (khonga) igam puah didan gengen lah a puah theih nang hun a ki-awng sut sawm teitei zel.., bang chi khong leng chi idiam buaihuai mahmah maw. I gam, inam hong pallut di deih lou lah omlou, igam kingakna tua siamsinte mah ihih chih lah thei, a khopi a omteng in bawl zoh a pallut sak zoh ngap ihi hia le.. I zoudawn a siamsinte tellou a puah zoudi hile zaw tha dawn na lah hi di uthuai na mai e maw. Lah, i zoudawn a siamsinte chauh inle puah zoulou di, ei  kia'n le puah zoulou di, i pan khawm kul ahih theithakthak leh deihhuai isa hi". - L Kam Johnson Ngaihte

Notes: SSPP RBC Toh kisai Report dang Simtuakte:-

1. Ginmuanthang Kullai, 'Teach Zoudawn: SSPP RBC Lungthul Camp', Siamsin Bulletin, Volume XIV Issue No. 12, July 27, 2008, Peek Khatna.

2. L Kam Johnson Ngaihte, 'Teach Zoudawn: SSPP RBC Sinzawl Camp', Siamsin Bulletin, Volume XIV Issue No. 13, August 17, 2008, Peek Khatna.

3. S Muandoulian Ngaihte, 'Siamsin Coaching Lohchingtak a khak in om', Tongluang Monthly Magazine, Kau Kha (August) Issue, Vol. XX No. 10, pp. 8- 9.

4. SSPP RBC 2008 Limlak te SSPP Delhi Website <www.delhi.siamsinpawlpi.or> ah Gallery>Zoudawn Vehna ah et theih ding.

[Hiai laigelh TONGLUANG | Phal Kha (September) 2008 issue ah kisuah masa ahi.]