MUALSUAH - 2025 Naupang Pawl Kumtawp Nipini Thugelh

MUALSUAH 

Dr. M Pauminsang Guite

I Saptuam Evangelical Baptist Convention (EBC) khukpi in tukum a ‘Naupang Pawl Nipoimohte 2025’ hunpi zat ding toh kisai laidal hon suah khiak na uah, kum tamlou paisa apan sappau a ‘Graduation Sunday’ chih thumal ana gelh zel pen uh zang nawnlou in ‘Kumtawp Program’ chi in hon gelh ban ua, 15th August 2025 ni a Child Coordinator, EBC in EBC Delhi leh EBC Central Delhi a Baptist Children Department (BCD) Sinsaktute toh Sinlai Bu Etkikna hong neih lai inleng khukpi lam apan hiai thumal zat a lemlouhna om zek ahihdan hon hilhchian hi. Khukpi lama heutulian te hon vaikhak chiamteh in ‘Kumtawp Program’ chih mai sang in, chi in, naupang lam Sinsaktute leh Saptuam group ah ngaihdan lakna kinei a, ‘mualsuah’ chih thumal apan ‘MUALSUAHNI 2025’ chih tukum i thupi ding hong piang khia hi. 

Theihna vantang dan in, MUALSUAH chih thumal pen tomkim in genchian ding hile, tup khat nei in tangtun thei, sin ding nei a sin khe zou, sep ding sem khin thei, mohpuakna zoukhe thei, puakgik neihte apan suakta khe zou, chih dan in gen leng kikhiallou ding hi. 

Huai mah bang in, naupang pawl lam ah mihing kumsim pansan a BCD lama Pawl guk viz. Beginner A, Beginner B, Primary, Junior, Intermediate & Senior te a kikhenna sung ah, kum 15 sung sin ding Sinlai Bu bu leng sawm-leh-nga (15) om hi. Naupang Nipi Skul in kumkhat sung sin ding Sinlai Bu busuah zou in, huai kum a sin dia kibawl ‘mualsuah’ chih theih a, mihingte theihna zanga etkhiakna (exam) te ah mark tam pipi mu uhi. Huai banah, mihingte kumsim dan mah pansan a kum 18 ching peuhmah Naupang Pawl/BCD lam mualsuah in Piching lam ah ‘tuailai’ hita din lut ding uhi.

Khristian naupangte piching lam lut ding khempeuh, Naupang Pawl Nipi Skul hoihtak a kai gige te, naupang pawl a om sung uh BCD in a tupte, huaituh - khalam, lungsim leh taksa a khangtou leh piching a sim dia naupang pawl lama sinlaite zohsak ahi uhi. Khalam ah piangthak a, khalam nawitui mahni a kitoudelh thei, lungsim ah mihinpihte toh kilual a ngaihtuahna theisiam ban ding leh taksa lam ale akhan hoih uh lamet ahi uhi. Huai teng bukim tak leh lungtunhuai taka hon mualsuah theihna ding un, a naupangte panlak banah naupangte hinkhua sek kha pangte Nu-le-Pa/Enkolte, Sinsaktute (Nipi Skul hi in School kaina a) leh akim ua amau toh hun zatkhopih tamte uah kinga mahmah ding theihsa ahi uhi.

Ahihleh, BCD in Nipi Skul apan i tup pen naupangte Khrist khebul ah pi ding chih naupangte khalam vai ahihna ah, hiai bang a ‘Nipi Skul Mualsuahni’ hun ah Nu-le-Pa/Enkoltu leh Sinsaktute adia dotna poimoh, i kingaihtuah tuak mahmah uh om ding hi. Huai tuh, hiai i naupangte uh kum 15 sung bang Naupang Pawl lam a Saptuam te khazak nuaia Jesu Khrist nungzui muanhuai hidinga naupangte hotdamna thu sinsakna i neih touh ngitnget lai un, Khrist khebul ah naupangte pina nasep na a i kalsuannate uah, i tup tak uh i mualsuah zou na un ikithei uhia? Nu-le-Pa/Enkoltu leh Sinsaktu ten i naupangte khalam, lungsim leh taksa a khantouhna din pan ila tatak zou na uhia? Naupang Pawl ah a om sung ngei mah un, KHELHNA mana TANGTAWN SIHNA ana MUALSUAH in, KHALAM SUAHTAKNA ngah a HOTDAMNA ngah din, i pi zou na uh hia? Naupangte etkolna ah Saptuam ten i panlakna i laknate uh deihkhop huai i sa na uhia? A paina ding lampi ah naupangte i chilna uah, i lungtung chiat na uh hia? Aw! Hiai leitung khualzinna i mualsuah hun chiang in, van ah i GOU kholte ah, ilung akim na diam?

Pansan: Paunakte 22:6, Matthai 6:19-21, Matthai 5:12, Kolossate 3:23-24, Philipite 3:14

Gelhna: CDEW, November 30, 2025