PIANNI KIPAHPIH
Dr. M Pauminsang Guite
Laisiangthou ah pianni lopna mun nih, Joseph hunlai a Pharoah pianni (Gen 40:20) leh Baptispa Johan
hun a Herod pianni (Matt 14:6) te ahi. Huai banah, Hotdampa Jesu Khrist hong pianni ding toh kisai leng genkholhna apan ahong pianna thu tampi mahmah ana kigelh hi. Himahleh, hiai ah mi thupi, Kumpi hingente pianni hun thum te ah, kua hiam sihna toh ana kizom kha vek a, ngaihtuahna tampi piang thei hi. Hiai a thiltungte ziak in, Nu-le-Pa khenkhat in tate pianni lop bang ana mullit leh hoih salou leng kiom in theihsiam huai mahmah hi. Inkuan khenkhat a ding in lah, tate tungtawn ale Toupa hoihna mutou zel chi in, inkuan a kipahna hunhoih zat khawmna khat hithei zelzel le hi. Hiai pianni kipahpihna leh lopna hunzatte naupang neute bang kilawp un ngaklah sek mahmah chiat uhi. Huai mah bang in, a upa lam ten le leng Jesu pianni hunbi kumteng a kizang leng kilawp in kingak lah chiat sek hi.
Pianni kipahpih a lop ding hoih hia hoihlou? chih dan lam hilou in, hiai a Kumpite Herod pianni lopna hun ah, naupang khat zat a om na, etdan leh muhdan tuamtuam tampi om thei hi. I theihchiatsa uh, tomkim in, Kumpi Herod in a sanggampa Philip Zi, amin Herodia akitenpih ziak in, Baptispa Johan in sianglou ahihdan Herod kiang ah va gen a, huaiziak in, Herodia in mudah hi. Kumpi Herod pianni lopna hun ah, Herodia in a tanu naupang siamna pansan leh fuih in, leh Kumpi Herod thuneihna zang in Johan lutang ana ngen sak in, a lutang a Nu kiang ah va pia hi.
Dotna leh ngaihtuah tuak tuamtuam om theite - Kumpi Herod pianni lop ziak a Baptispa Johan si i chitang thei diam? Huai ma hunte a ‘huatna chi’ koi apan ana kipan khin ahita dia? Johan in Kumpi Herod kiang ah a sanggampa Zi aneih sianglou ahi, a chi in, Herod in bel kihta a kipaktak in ngaikhe mahleh, bangziaka Herodia in ana hua a hihlup ut ahi dia? Herodia in atanu naupang kiang ah ‘Baptispa Johan lutang’ ngen dia ana fuih na leh zuih pah na in, naupang ten Nute ah a muanna uh bangchituka lian ahi dia? A ankuang umpihte mi thupite, sepaihheutu liante omlou hile uh, Kumpi Herod in a chiamsa himahleh, a Nu sawl ziaka naupang ngetna mulkimhuaitak, khek thei mailou din i gingta hia? Bangziaka khelhna hihtute vualzou a kilang ua, ‘midiktat leh siangthou’ a ki chiamteh pen in sihna tuak?
Baptispa Johan in mi thupi khat gamtat hoihlou Pathian mitmuh a siang leh sianglou ahihdan sih tanpha in hangsan tak in gen in dinpih ngam hi. Himahleh, leitung ah bel, Johan sihna ding in numei naupang khat fuih leh zat a om ahihdan haihvual hilou hi. Khelhna ziak in huatna hong piang a, midiktak leh siangthou chi a Laisiangthou a chiamteh om hihlupna ding in, sia-le-pha thei nailou naupangte nasan le fuih leh zat a om thei uh ahihdan muh chiang sem in om hi. Huaiziak in, mihing a piang khia khinte ‘naupang lawlai’ chi a ngaihnep theih ding vual hilou hi.
Tuni in ei hun ah leng, i tate, i naupangte, i khangthakte, i thuzohte, bang chin i thuhilh ua? bang chin i chil ua? bang chin i zang ua? bang chin i fuih ua? Thilsia i hih utte, lah, mitheih a ihihkhiak ngamlouhte sepsuah na di maimai dia zang kha sek ihi uhia? Setan deihlam sepsuahna a zat a om ding in kuaman i tate leh naupangte i phal kei hial ding uhi.
Jesu in bel, ei mikhialte hon haw mailou in, tangtawn hinna i neih theih ding leh vangam i lut theihna ding in naupang neuchik te zang in ana gen chiang mahmah hi. Ban ah, i la un ‘Naupang khakha in leng hotdamna thu gen thei chiat uh… Naupangte’n leng hotdamna thu gen thei chiat uh, Hontanpa hon ITNA thu’ chin naupang neute zatna hoih a zat ding hon theisak hi.
Tuni in i tate, naupangte leh khangthakte pianni kipahpihna hunte i muh chiang un, zat na hoih sem a zat ahihtheihna di ua damna piak a om ihihdan phawk sem in, amaute ahoihlam ah, Pathian hon ITNA thu leh Jesu Khris a HOTDAMNA thute puanzak ahihtheihna ding a chil in, hanthawn in, zang thei chiat le, Pathian gam hong tun chiang in, nuam in chia maw.
Pansan: Matthai 2, Gen 40:20, Matthai 14:6, Marka 6:14-29, Matthai 18:2-5, Matthai 5:11-12, Paunakte 22:6
 |
No comments:
Post a Comment