NAUPANG NEUTE, NUNGJUITE LEH JESU
Himahleh Jesu’n, “Naupang neute ka kiang ah hon paisak unla, kham kei un; van-gam hichibang mite a ahi ngala” Matthai 19:14
Mihing ten hondampa Jesu toh kituahkik na ding a ina kithuhilhna poimoh masa pen ahihleh i naupanlai a Jesu Khrist khebul ah kipi ding ahihdan atunga Laisiangthou ah kimu leh i pansan poimoh pen ahi, chi le kikhial lou ding hi. Naupang neute tunga khut nga a thumsak dia ava tonpih lai ua, Jesu thugen in naupang kepna a dia gennop tampi neithei in sut theih hi.
1. Hun Pia: Jesu’n mipi sangli vakna a neih zoh lak leh mipi tampi in Amah azuih san lai vel uh ahi a, mihonpi huai zah in azuih lai leh hun kibichilh lak ah, Jesu’n naupang neute limsak in amau adi’n hun ana pia in, naupangte tung ah a khut nga in vualzawl in, huai azoh in huai mun apan paikhe pan hi.
2. Ninglou: Naupang hon omkhawmte miza uh i theih chiatsa bang in, bengseng, phiaphia, om kinken theilou, thumang pahpahlou hunkhop om tangpi uh ahihmah in, hun tamzaw ah ninghuai pi dia omkha uh din un le ginhuai hi. Huailai inle, nungjuite’n naupangte ana tai/sal maimah uhi. Himahleh, Jesu’n a nungjuite awilou in, naupangte pansan in a nungjuite leh thuhilh zawk na in nei hi. Gingtute’n le Jesu nungjuihna a i niteng kalsuannate uah, theihlouh kala khovel thilte/kilawmnate pibawl zawk khak ziaka naupangte ninbawl om kha theite apan Laisiangthou a Jesu thugen phawk kik zel poimoh hi.
3. Sapna Bawl: Jesu kiang zuan a naupang neu hong paite ana kham leh tai tute, ginglou mi hiam ahihkeileh pawlam mi hilou in, hunsawt kuamtak Jesu thugen za a, theisiam pen leh itna hau pen dia lamet, Amah nungjuite mah hi uhi. Banah, Jesu in ‘naupangte neu lawlai uh’ hiam, ahihkeileh, upa zaw deuh hun uh ngak ding chih dan chi tuanlou in, huai mun mah ah, Amah kiang zuan ding in naupang neute sapna kichiantak bawl ngal ahi.
4. Amah adin zalensak: Hinna thak lunggulh a Jesu kiang zuan nuam hiam, Amah thute za a houlim nuam, Amah phatna late sa nuam hiam, Amah naih nuam naupang neu kuapeuh adin, Jesu in zalenna zapi pia hi. Leitung a siamsin leh khosakna pai toutou ding ah, Jesu nungjui ut a, Amah lampi tawn nuam naupang omte, khamlou a Jesu kiang zalentaka zuansak ding in, ei a pichingsa Jesu nungjui kichi lelte thuhilh a om ihih uh hon phawk sak hi.
5. Vangam Limlang: Jesu a lutlai leh mipi in abom luailuai hun laitak uh hi di ahihna ah, nungjuite lak ah le, Jesu sang mah a amau mah ana kithuneisak zaw hiam, ahihkeileh amau kipoimohsakna lungsim sianglou nei uh ahingei dia, naupang neute’n Jesu kiang hong pai un, ana nang/khawlsak mai hilou in, ana tai/sal zomah uhi. Lungtang theipa Jesu in Amah nungjuite lungput theilua hiding ahihchiang in, vangam lutna ding in, hiai naupang neute banga lungsim siangthou leh kingainiam ding ahihdan gen in, naupang neute sinsakna hoihtak suah hi.
Pansan: Matthai 19:2, 14-15, Marka 9:36-37; Matthai 18:1-5 & I Samuel 16:7
No comments:
Post a Comment